Schnitzelbangg 2007

Diefschleeg z’Bärn.

Wär im Sport ebbis wott wärde, dä muess vyl drainiere
Und mänggmol wärde Gschichte druus, die kenntsch as Määrli fiere.
So kasch si seh im Bundeshuus, boxe wänn und dien die siibe,
Si iebe sich in de verbottne Diefschleeg und leen d Fairness bliibe.
Und wenn dr Blocher droffe wird so stampft är alles eebe
wie s Rumpelstilzli synerzyt und z Basel duet s denn beebe.
Zem Droscht git denn als s Läggerli vom jingschte Blocher-Spross,
die isch vom Läggerli-Huus z Basel nämmlig jetzt dr Boss.
Dr Moritz, unsre glaine Muck, hett schnälli Stiifel aa,
är segglet vor de Gegner furt, so schnäll wie s kaine kaa,
schloht Heegge wie dr Holifield und blybt im Egge stoh,
s waiss kain, wie s mit em Fluglärm z Klote ächt soll wytergoh.
D Färnsehgebyyre lehr dr Moritz au nimm schloofe z Nacht,
s Programm wird nur no schlächter, syt s die Deltenre macht.
Hansruedi Merz zieht d Schruuben a, mer mien an allem spaare,
as Räuber-Ali Baba zieht er ab mit vollem Kaare.
D Subvänzione wärde kiirzt au bi dr Landwirtschaft,
vo jetzt aa dringgt me nur no EU-Einheits-Riebli-Saft.
Dr Sämi Schmid vom VBS ladet dr Ali y,
deggt em der Disch und mecht so gärn wie dä e Profi sy,
wott von em Boxe, Technik und Finesse meeglischt grindlig lehre,
är wott sich drum parteiintärn geege dr Blocher wehre.
E jede, wo das VBS hett gfiehrt as Bundesroot
wird karikiert und kain isch bees, will me dr Witz verstoot.
Dr Pascal Couchepin isch Zwärg Nase, mit sym grosse Pfohl,
Är hett d Frieh-Räntner dinn, s git nyt, erscht denn isch em wohl.
Au s Defizit bi IV/AHV will aifach nit ewägg.
Iberall mischt är sich yy und macht dermit vyyl Drägg.
Doris Leuthard, Meischterschwande, drait scho dr WM Gurt,
si jagt die guete Styyrzahler mit Uffschleeg aifach furt.
Drfir hett si e Fraid am grosse Migros/Denner-Deal,
si hett s scho tscheggt, mer zahle halt bis jetzt scho bitzi z vyyl.
D Micheline lacht wie Dimitri, trotzdäm isch naimedure
si d Pächmarie und dorum au e weeneli z beduure
D Osmane, die sinn hässig, si darf nimme in d Türkei:
"Waisch,Calmy-Rey", so schrybe si, "Du lieber blybsch dehai!".
S isch drum bim Boxe wyt verbraitet wie bi kaim andre Sport.
D Kämpf wärde türggt, s gwinnt nit der Bescht und das an vyylen Ort.
Z Basel, am Match zwischen em Russ' Valuev und em McCline
doo kennt me s lehre, doch vo unsere siibe sehsch do kain.